Bergüner Ländlerfründa

Biographie

Erzählt von Werni Walser:
1970 hät dr Pauli d Lehr als Elektromontör bir Firma Kummler & Matter z'Bergün agfanga. Mina Papa (dr Lieni Walser) isch in dära Buda Gschäftsfüahrer gsi, also dr Scheff vum Pauli. Dua bin i no schwär in d'Schual und ha dernäba vil Zyt gha, uf minam nöia Klarinett uma z'trucka (natürli mit pfiffa). Das hät ma schinbar bis in d'Werkstatt ghört, dia isch nämli drei Stöck unter minam Zimmer gläga. Dr Pauli isch uf all Fäll vu mina Künscht häll begaischtarat gsi und hätt mi am nöchschta Tag gfrogt, ob i ihm d'Griff für dia hocha Tön nid chönnti zaiga. I natürli ganz schtolz: "Jo, jo, das kann i scho!"
Am nöchschta Samschtig bin i dänn uf z'Poschti Richtig Latsch. Im Sack a Füfliber vur Mama und unterem Arm ds'Klarinett. Dr Poschti-Schofför Clo Florinett hät mi sicher uf Latsch ufa brocht. In dr Schtuba vo z'Struba dänn a zünftigi Ernüachtarig für da kli Walser. Dr Pauli und dr Moll (Paulis Papa, dr Paul Strub senior) händ mi nämli halba trümmlig gschpilt! Vu wäga hochi Tön und Werni! Dia hät miar denn dr Pauli biprocht - baidi sind miar jewiils in Schweiss badet gsi. Vu döt awägg bin i dänn praktisch jeda Samschtig mit em Clo, em Klarinett und em Schlitta uf Latsch ufa gfahra. As isch güabt worda, im Sitza, im Stoh, uf em Stalltach und au bim Marschiera.
Bis ins Johr 1974 händ dr Moll und dr Pauli unterem Nama "Kapella Strub" im Duo Musig gmacht. I han no nid mittörfa, i bin jo no nid konfirmiert gsi. Aber im April isch as denn sowit gsi. Vo döt awäg hät mi nüt meh könna heba. Dr Pauli und ii sind wia siamesischi Zwilling go musiga, bi jedera Glägaheit und an jedem Alass. Miar händ sogär as Mol no anera Beärdigung (also dr Giulio isch guat achzig gsi) im Wiss Chrütz z'Bergün Musig gmacht. Und dänn isch as mit da Bergüner Ländlerfründa erscht so richtig losganga.
Vo 1974 bis 1976 in dr Bsetzig: Pauli und Werni Klarinett, Papa Moll und Papa Walser Örgali und Hitsch Hassler Bassgiga. 1976 isch d Mia Kast, a Cusina vum Pauli, als Bssischti für da Hitsch Hassler igschtiga. 1982 häd miar wider a nöia Hitsch übercho. Dr Papa Walser isch nämli vum Hitsch Züscht us Furna abglöst worda. Ab em Joor 1989 hett mina Bruader, dr Markus Walser, langsam aber sicher em Papa Moll sina Platz überno und 1995 isch in Sacha Bsetzig denn di letschti Änderig passiert. Ds Vroni Egli us em Schangnau hätt d'Mia an dr Bassgiga abglöst.
Sit 2006 kunnt dr Fluri Burger regelmässig mit üs als Bassischt mit. Z’Vroni hät nämmli a Familia gründet und kann nümma so viil mit üs ummazücha. Also so hämmer nochama würdiga Nochfolger suacha müassa und im Fluri natürli au gfunda.