Igl Chor viril Surses è nia fundo igl 1907. Dus gheras mundialas, la depopulaziun a la fegn digls onns 40 ed all‘antschatta digls 50, igl svilup turistic e dalla conduita sociala caracteriseschan fermamaintg l’istorgia digl chor. Graztga agl success musical digls davos decennis èn igl domber da radond 60 cantadours scu er la media da vigliadetna d’anturn 50 onns sa stabilisos. Igls cantadours dereivan da tottas fracziuns digl cumegn da Surses (da Beiva sur Savognin anfignen Salouf), dalla Val Alvra ed adegna daple er da Surmirans cun domicil an Tumliastga ed igl conturn da Coira tgi laschan ancrescher. Igl svilup demografic inquietont dallas vals e la regiuvinaziun digl domber da commembers è e resta ena gronda provocaziun pigls proxims onns.
Igl Chor viril Surses è nia fundo cun la fegnameira da cultivar e promover igl cant rumantsch viril. Mintga 5 anfignen 7 onns risca igl chor da preparar ovras vocalas pi grondas scu p.ex. Igl “Gi festiv dalla Tgalavagna” (Otto Barblan), Cantatas (Gion Antoni Derungs/Gion Giusep Derungs) ed ovras sacralas (scu igl oratori „Taimp ed eternitad“ da Franz Xaver Schnyder von Wartensee ed igl Requiem da Franz Liszt). El sa participescha regulamaintg a festas da cant districtualas, cantunalas e federalas, pigliond adegna igl migler predicat an meira, tchegl tgi vign er cuntanschia cun gronda regularitad.
Igls amprems decennis è igl chor nia dirigia da laics, per regla da scolasts. Siva digl 1967 stat igl chor sot la direcziun da musicists da professiun. A Gion Giusep Derungs (dir. 1967-1985) èn suandos Curò Mani jun. (dir. 1985-2000) e Luzius Hassler (dir. 2000-2015). Igl aton 2015 ò Rainer Held (*1964) da Landquart/GR, sesent a Hitzkirch/LU, surpiglia la direcziun musicala. Held ò fatg igl studi da diriger, ò stibgia cant solistic e scola da musica I e II. El magna actualmaintg la partiziun musica dalla Scola ota da pedagogia a Lucerna e lavoura scu dirigent ospitant cun numerous orchesters e chors an Svizra ed agl exteriour.
Per ulteriouras infurmaziuns, ena commembranza passiva u ena pustaziun da prortatungs supplitgagnsa da suandar la pagina www.chorvirilsurses.ch
