L’è Natal
(Paolo Tomamichel, suisa 2021)
Paolo Tomamichel-voce,chitarra,bouzuki,ukulele,tastiere,percussioni
copertina di Yelena Tomamichel

Senza fà rümor, stanott som levà sü
a vardà la fiòca ch’è vegnüda giü;
con ‘na candelina g’ho dai n’ögiada al nost pinin
e pöö senza fiadà g’ho carezzà el crapin.

E senza fass sentì, u s’è sveià anca el gatt
a giügà coi bòcc al post che ciapà i ratt;
u s’ciopèta ’n sciücch e i trisch i vola e i gira
come füssan balerin nel gran teatro del camin.

Oh Signor Signor, com ‘em cunsciàd el mond:
a l’è diventà quadro, ma tì ti l’evi fai rodónd.
Oh Signor t’ se’ chì, ma nümm a sa fémm mai sentì,
giüsta chela volta quand che pénsom da morì.

Per quaidün gh’è sempro el sóo, per quaidün l’è sempro nott,
per quaidün gh’è pòch, perché altri i ga n’ha tropp;
con giaca e cravata tocherésa fat vedé,
che inscì forse i tò bei pensée i gent i scoltéress püssée.

Con un gran casott, in ca’ i è tücc in pée:
gh’è el Bambin in dal presepi, vegnì tücc a vedé.
E mi sbassi la crapa e ma mèti giò in ginöcc.
L’è Natal e a ‘sto pinin l’anima mea l’ha verdü i öcc.